“Axmed” Geeri daadii Qalbigu ila Guhaadowye

Waxaana Halkan idiinku soo gudbinaynaa gabay Qiiro xambaarsan oo la tiriyey kadib Dilkii Arxandarada ahaa ee loo gaystay Weriye Axmed Saakin Faarax oo Maanta lagu aasay Magaalada laascanood.

Axmed geeridaadii qalbigu ila guhaadowye

Gacal kaa xanuunsde walow iilka lagu geyne

Gacan kaa xaqdaranbaa haddaa guudka loo sudhaye

Godka lagu janneeyoow adaw guuray meel wacane

Wax maad galabsan, uunkii ku ganay, waw goblamayaane

Waxan gocan shan kuu gaar ahaa oon gudbinayaaye
–
Gelin dhow caruus baad ahayd gaari guursadaye

Guri baad masuulkii ahayd golaha qoyskiiye

Gacal kugu hirtiyo waxa ku tebi gacaladaadiiye

Dhiiggaagu goobtuu ku dumay waa gol noo mudane

Garab nagu bannaanaa hadduna goorxunbay timiye

Allahayoow ku gaadhsii jannada golihii weynaa

–
Go’doonkeeda Laascaano iyo silica loo geystey

Gumaadkiyo xasuuqiyo dulmiga guudka laga saaray

Maatadeeda gawraca mutiyo, goorrintiyo, tawsta

Geesi u guntaday baad ahayd cadow ka giigaane

Garab nagu bannaanaa hadduna goorxunbay timiye

Allahayoow ku gaadhsii jannada golihii weynaa
–
Raggu iilka waa geli jiray goor ay joogtaba’e

Goob laga baroortaa ku badan godanka Soomaale

Gaashaan bir iyo baad ahayd gole dugsoonaaye

Runta kama gabbade baad ahayd xaqa ku gaadhnaaye

Garab nagu bannaanaa hadduna goorxunbay timiye

Allahayoow ku gaadhsii jannada golihii weynaa
–
Giiryaale fulay baa ka qaxa gabadintiisiiye

Adaa geed adayg iyo ahaa geesi aan biqine

Ummadda u gargaaraad ahayd garab aan liicayne

Gebi baa ku dumay reerahaad gacal ahaydeene

Garab nagu bannaanaa hadduna goorxunbay timiye

Allahyoow ku gaadhsii jannada golihii weynaa
–
Qofba wuxu galaa laga guntaa guudka dunideere

Waxaad qalin ku gunuddaa rag kale qori ku goosteene

Guubaabadaadii la maqal gees la joogaba’e

Galiilyaan ka qaadiyo inaan gama’ la diidaaye

Garab nagu bannaanaa hadduna goorxunbay timiye

Allahayoow ku gaadhsii jannada golihii weynaa
–
WT. Maxamuud Axmed Cabdalla (Al-Makhiri)

Email: mabdalle@gmail.com