‘Guul Maakhir’

Gabaygan la magac baxay ‘Guul Maakhir’ waxa tiriyey Maxamuud Axmed Cabdalla (AL-MAKHIRI). Wuxu ku hal qabsanayaa Saalax Yuusuf Dabaraan. Gabaygu wuxu soo if baxay ka dib markii dhowaan laga aasaasay Maammul Dawladeed Gobollada Maakhir ee Puntland, Soomaaliya. Maammulkaas oo ka hirgalay Gobolka Sanaag, laakiinweli dhismihiisii aanu dhammaan dhanka Gobolka Haylaan. Gabaygu waa ‘Guul’ ka hadal iyo talo soo jeedin.

Wuxu Yiri.

Warka Saalaxoow soo gudbaye laysu wada geeyey

Ee Godanka Soomaaliyeed uunka wada gaadhay

Gallad baa inoo soo gashiyo seben galgaal khayre

Wax la yiri geyigii maammul baa loo guddoonsadaye

Maakhir gobolladeedoo dhanbaa gaar ismaamuliye

Buntilaanna loo wada gudboon magaca guudkaasee

Goortii yagleel loo kacaye gole la maamuusay

Badhan goolkii way dhalisayoo dawlad loo gunudye

Gobannimiyo sharaf bay dadkii libin ku gaadheene

Cabdullahi guushuu dhashiyo duulkii garab joogey

Allaylehe gundhige maammulkii gaafe calankiiye

Gobolkii Sanaag dawlad buu soo gelbinayaayee

Afartaa gudbaye xaajadii igu giriifaysay

Godankeeda Haylaan wixii laysla garan waayey

Gacaltooyadeedii bal aan uga dul geeraaroo

Dhahar baa gilgilan baan lahaa gobolka Haylaane

Guurtida ku nool baan lahaa way guntanayaane

Xilkii odayadii way gabeen gaarranaan jiraye

Gacalloow Siciid Shire halkuu talada goynaayo

Guul buu ka dhalin baan lahaa waase gaasiraye

Goldaloolo way muuqataa waana shay garaa ahee

Waxay gocan Buraan gacaliyoow goobtii laga sheegye

Xingalool ka guulmoo tashigii gebi dhac weeyaane

Sow gobolka inay wada dhistaan gari ahaan mayso?

Gungunnaaf shisheeyuhu dirtoo galabba meel jooga

Iyo guuldarraystaha ‘hunguri’ goob walba u taagan

GOONNI GOOSADKII baa hadimo soo gunaanadye

Abidkiiba gega-roorku Dhahar guul kamuu helo’e

Gaashaanka nimankii hayaa talada soo goyne

Inkastay ka gaabsheen marbay soo gadaal bixiye

Email:mabdalle@gmail.com