GABAY: HOOY! DAGAALKA JOOJAAY! By Abwaan Maxamuud Axmed Cabdalle

 Wuxu yiri:

Awel maanso waataan dabroo, doodeheed dhigaye

Waataan afkiyo labada daan, aan dabool bidaye

Goortay dadkeedii tageen, haatan damac beeshay

Waataan dan uga baxay kolkay, noqotay deebaaqe

Waataan daguug madhan is idhi, hawgu daakirine

Eebboow xaluunbaan damqaday, oo dareen qaxaye

Damiirkayga nool baa I yidhi, doono maansadane

Dadkaygaa isdili baan wanaag, ugu dalbaayaaye

Duullaanka Ramadaan la dumi, baan ka digayaaye

Eeebboow colaadahakan dami, la isku dooxaayo

Eebboow dulmiga kii wadiyo, daallinkaba dhaafi

Daadaansi banu aadamaha, daaya laga waaye

Eebboow xaqa u daalici xigtaa, laysku dirayaaye

Afartaa dabuubtii murtida, deelka maansada dheh

Diiwaan maslaxad lagu dhigiyo, degel nabdoonaan dheh

Isu diirnaxiyo ehelnimiyo, daraf wanaaggii

Dheh

Dacwad kalena waa aniga iyo, dan iska sheeggayga

Dulmi adiga oo waa tirsaday, kibir haddaa duushay

Aad doontay xaajada dur iyo, daabacba u jeedi

Fidno dabarka loo furay hadday, talada kaa daahdey

Ogoobeey dembiga waxad ka noqon, derajadii kowe

Muusoow xumahaad daajisee, ubadka daaqsiisay

Ee tidhi dalkaa kala go’iban, dood yar kaa odhane

Haddaan daacad loo odhan, warkuba waa is dumiyaaye

Dacwigayga maqal waa intoo, kugu duwaa guulle

Goortii dalkeennii burburay, ee lakala dawray

Nin waliba docbuu deyrtayoo, dawladay yidhiye

Damac iyo awooddii qabiil, loo durbaan tumaye

Dabadeed dhibkii dhacay, kolkaad goosi ugu diiqday

Kuwa deyrka soo dhaafay, iyo laaji daba joogey

Ayaa calanka diillimaha badan, daarta kuu sudhaye

Dadka Reer Waqooyigu ma rabin, darammalkinniiye

Dabinnadii qarsoonaa la eed, dagantideediiye

Dulbaxii nabsigu waakanoo, daadka soo rogaye

Durki oodda haddii aadigoo lahaa, laysu dacareeye

Deegaan walbaba reer ayaa, daa’in ku abuuroo

Dib in loo heshiiyaa wacnayd, duudsi daba oole

Daba qabasho uur xaadhni gacal, lagu dabiibaaye

Doobkiyo gashaantida wixii, bado ku daadduumay

Da’yartii tahriibta u baxdee, dabargo’ee lee’day

Dagaallada sokeeyaha wixii, duugmey ubadkeennu

Duunkii ka soo hadhay haddaad, dooya bixi doontay

Sida caws dameer cunay hadday, dugagga taaltaallo

Waa garasho doqoniimo lee, dib isu weydiiyoo

Daa’inkaa kayaab maalin baan, la isku deynayne

Hooy! dagaalka joojaay, samay nabadi doontaaye

Afartaa dabuubtii murtida, deelka maansada dheh

Diiwaan maslaxad lagu dhigiyo, degel nabdoonaan dheh

Isu diirnaxiyo ehelnimiyo, daraf wanaaggii

Dheh

Dacwad kalena waa aniga iyo, dan iska sheeggayga

Duruufaha gurracan maammulladii, kala didkii uumay

Ee nala dul gawraarshaayee, qolada loo deyrey

Cabdiweli adaa daadahshoo, diiraddow sida’e

Dalka loo dhicinayaan tolnimo, dood yar kaa odhanoo

Dulduleelladaadaan caqliga, kuugu darayaaye

Walaalow durbaan dhiillo iyo, tol isku daaweysta

Waa dalalladay eeddayoo, dhigay daleeshaase

Haddaan doorashada lagu gelayn, mala dareenkayga

Faataxo dabuubtii lahayd, lagu dadduucaynin

Dildillaaca waabberi kamiin, la isku dooxaayo

Dhiig daatay Ramadaan nafluhu, kuma dabbaasheene

Dhallintii waraabaha dugaag, kama dubaaxdeene

Dad isdhalay ismay gawraceen, duud xigaalaahe

Daa’imo ka liitee nimaan, taa ka diir gubane

Waa garasho doqoniimo lee, dib isu weydiiyoo

Daa’inkaa kayaab maalin baan, la isku deynayne

Hooy! dagaalka joojaay, samay nabadi doontaaye

Afartaa dabuubtii murtida, deelka maansada dheh

Diiwaan maslaxad lagu dhigiyo, degel nabdoonaan dheh

Isu diirnaxiyo ehelnimiyo, daraf wanaaggii

Dheh

Dacwad kalena waa aniga iyo, dan iska sheeggayga

Daamaha colloobiyo xigtada, dociba duud eedday

Dadka Sool dulmiga lala damciyo, dabinka loo qooli

Darxumada Sanaag lala rabiyo, daab isugu dhiibka

Nin damiirle waa garanayaa, dulinka hoos yaale

Dadkan layska sheegtee xumaan, lagu dufaynaayo

Labadii dun wada sheegatiyo, mahurto deegaana

Dabka waxa dhexdood loo dhigaan, diirka ka caddaynoo

Sida weli daliilkii hayaan, soo dallacayaayoo

Soomaalaan u digayaa nimay, dani ka haysaaye

Dudaday ku dhalatee xornimo, duudka uga liicday

Garaadkii Dabliyo culimadii, diinta derejeeyey

Ajuuraan dadkiisii, kufrigu daabaca u qaaday

Gellidigu dagaalkuu u galay, dawladnimadeenna

Axmed Gurey halkuu darafta Maydh, hiil u dayanaayey

Dulcaddaha kobtii uu Darwiish, uuska kaga daadshey

Gobannimo halkii dihatayee, dunidu maamuustay

Degel lagu murmaa laga dhigoo, lagu danaystaaye

Dadkeedaa u kaday ee Sanaag, lama dullaysteene

Sool lama durraaqsheen hubkii, Xabashi daan gaabe

Danaystiyo horgale daaddufaa, loo dalleensadaye

Daandaansi xaafadi dirqiyi, xaafad deriskeeda

Waa wixii horaw dumiyayoo, loo dembow falaye

Hooy! dagaalka joojaay, samay nabadi doontaaye

Afartaa dabuubtii murtida, deelka maansada dheh

Diiwaan maslaxad lagu dhigiyo, degel nabdoonaan dheh

Isu diirnaxiyo ehelnimiyo, daraf wanaaggii

Dheh

Dacwad kalena waa aniga iyo, dan iska sheeggayga

Dalka aynu leennahay geyigan, maalka lagu daahay

Duunyadiyo xoolaha nimcada, daa’in Ina siiyey

Ku mannaystay xeeb dacalla dheer, daymada u roonoo

Kalluunkuna daf yahay aad tarraqad, gaajo kaga doogi

Dahabkiyo macaadiin widhwidha, maarta lagu duugey

Ee dheemmantuna daadsan tahay, dooxa iyo oogo

Ee daawashiyo qurux u dheer, Daalo lagu dheegey

Calmadow daruuraha rogmada, daaf ka dhuganaysid

Ingiriiski doorada lahaa, deeqdi ma ahayne

Talyan iyo dayuus Franji ahi, nama degsiimaynoo

Duulaan gumaystuu ahaa, oo dorraad yimide

Dalku waa dal Soomaaliyeed, dhaxal aan duugmayne

Dadku waa dad Soomaaliyeed, diir xigaalaahe

Diintuna mid weeyaan xaqaa, daalacoo jira’e

Hooy! dagaalka joojaay, samay nabadi doontaaye

WT: Maxamuud Axmed Cabdalle