Gabayga Dadqallada Fadhiya Xamar 23/9/2020 By Abwaan Maxamuud Cabdalle
Dawannada walow uu diroo tixaha soo duubo
Ka demane dadkani waano iyo duurxul iyo weedhe
Dadka maanta joogaan lahayn ficil dareenkiiye
Aan dig siiyo maansadu xaqay daalacii ii tahaye
Doorashada la deebaaqshey baan dood yar kaa odhane
Sowtii Kursigu deyn ahaa doorashadu maaha
Sowtii dalkuba iib ahaa doorashadu maaha
Sowtii codkuba dalab ahaa doorashadu maaha
Sowtii nin rabey duuli jirey doorashadu maaha
Sowtii jeebku daadihin jiroo door ka qaday maaha
Sowtii odaya dhaqameed dejeen doorashadu maaha
Sowtii cad lagu daaqi jirey darib shishloon maaha
Sowtii cadligu dawri jirey doorashadu maaha
Dulmigana la caadaysan jirey doorashadu maaha
Sowtii la kala doocin jirey doorashadu maaha
Isinkuna damaashaadi jirey doorashadu maaha
Doollarkana ku baashaali jirey doorashadu maaha
Sowtii dacalka loo dhaamin jirey doorashadu maaha
Dabadeed la been dhaaran jirey doorashadu maaha
Duf ku baxe la soo taagi jirey doorashadu maaha
Sowtii dillaalnimo ahayd doorashadu maaha
Lacag debedda laga keenay bixi loo dewerey maaha
Dal qalaad go’aankeed lahaa doorashadu maaha
Afartaa duxdii ararta iyo deelka maansada dheh
Dawaarrarada murtida haybad aan iga dibboonayn dheg
Dubbe aan u haystiyo dabuub dakharradeedii dheh
Haddii aanay dani igu jirrabin kuma denbaabeene
Qarankaa daleeloobey bay dib u guhaadoone
Soomaalida damiirkii ku hadhay dunatan gaadhsiiya
Doqonbaan dareen qabin naflaha jooga dunidaase
Durba way illowdaa wixii loogu daw galaye
Dakharradu ma doogtaan geddii ruux dareen qaba’e
Dabinkii dorraad lagu riday dalam tidhaahdaaye
War sow dawladnimo maanay dhiman duudsi lama yeelin
Sow waxa la kala doorayaa daa’imadii maaha
Afar sanoo dufule kale qabtoo dib u khasaarowda
Sow waxa dalkaba lala damcoo daw ka ridey maaha
Afartaa duxdii ararta iyo deelka maansada dheh
Dawaarrarada murtida haybad aan iga dibboonayn dheg
Dubbe aan u haystiyo dabuub dakharradeedii dheh
Haddii aanay dani igu jirrabin kuma denbaabeen dheh
Qarankaa daleeloobey bay dib u guhaadoone
Soomaalida damiirkii ku hadhay dunatan gaadhsiiya
Dadqallada fadhiya Xamar farriin damaqda gaadhsiiya
Ma diqoodayaashaa xaqii soo dul joogsadaye dheh
Eebboow, Ibliis baa dirsaday duulkan caasiyaye
Waa wada dillaal iyo mallaal doollar caabuda’e
Waa wada damiirlaawe iyo dooxatiyo jaane
Waa wada dameer aan kasayn qarankan diiftoone
Daaray ka jeexdaan arlada dalal shisheeyaade
Agoomaha ag dalanbaabiyaan saatan loo deyine
Deked iyo garoonnaba kiray dalal ku siiyeene
Nin diyaarad sii saaranoo duhurna soo saaran
Oo dano shisheeye u ordaa daakhilkaw galaye
Daacadi hungowdoo wanaag laysu dacareeye
Ma goblamin dalkaygii xaqaan daalacii imane
Dadkiisii ma dabar go’in walow jeex dumoo tegaye
Weli waa durduriyaan fardihii Dooxa-Dheer Gebiye
Dib jalleec bal taaiirkhdu waa dhaxal da’weynaaye
Waxa aan la diiqoonayaa daallin ii taline
Duxda eydii naga laastayee abid darkii taagan
Meel maato ay dudi kuweer sii durbaan
tumane
Madax suudh ku daanshoon caqliga doonni laga saaray
Oo caydha doca taagan aan dhab u danayne
Duumada qabiilkiyo inkaar daaro goboleedka
Aan kugu duul noolaado eex loo diyaarsadaye
Diin, diimo lagu hoos wadiyo iyo dariiqooyin
Dabaabaad AMISOM waddiyo qaaxo loo dedaye
Dunji guyrrayaa daaman weyn deyrka lay tubaye
Beel Caalam digo ololisoo diradirayn jeere
Ma dellegannay maantaa dugaag naga duxaystaaye
Eebbow kuwani dawladnimo ceeb ku daabace’e
Della malaha Soomaalidii damaca weynayde
Kuwa derejo aan haysanbaa maanta duub xidhane
Tan iyo dub u xorowgii dhibbaa duudka loo sudhaye
Dulli iyo gunbaa amarta iyo dirar xufaadkiiye
Waa dardaarankii Nebiga (SCW) oo igama daahnayne
Inaan dunida aarsado intaan diillintu istaagin
Qiyaamuhu daf soo odhan middaa duurka waw geliye
Daacuun Allahayoow u keen laalluush daba jooge
Doorashada ku sheeggaa Alloow xaqa ka soo daahir
Caqli doorka Eebboow talada daacadda u hiili
Xil dumaalka Eebboow ka yeel midan dhac donaynin
———-Dhamaad————
Comments
Post a Comment